logo

Prenzipal Adibir web Escribe-nos Rechistra-te Nobedaz
A tuya finestra
 Relatos por "Bazilo" (Diago Lezaun)
Relato erotico
A espalda, que se tensa como a pelleta d'una pandereta á o sol tanimientres tres didos, como tres aladros, la esnabesan en reuta ringlera dende a foyeta de pels enzetáns dica o puesto an os pels renaxen, dillá d'a muga que siñalan as nalgas.

Os poros que s'arizan enta o zielo d'a cambra, como querendo recullir á os tres didos y una boca, d'o lau fosco d'o cuerpo, amagada por l'almada s'ubre leu y alenta aprezisada dentre selba de zerras embrencadas de caragols.

Labios con labios, con didos labios, labios con güembro, con piez labios, con camas labios con peitos labios, os d'ella,
con peitos redondos labios,
con peitos tersos labios,
con peitos suaus labios, 
con peitos tibios,
atentos, dulzes,
rosaus labios os d'el.

Agora ye ella qui l'acarraza á el, con as camas, con os muslos, con a fonsera, con os brazos, con os labios os d'ella y lo cabalga luén y pando, como a mar en a espuña.

En bienen olas y tot s'atapa y bulle: os muslos, a fonsera, os didos d'as mans, o güembro, os peitos, os labios, os d'ella, os labios, os d'el y os tres didos como tres aladros dentre as zerras embrancadas de caragols y s'estabulla como un beire de lei calién, sobre el y sobre ella, y tot s'engarona.

A ulor d'a bresca d'os cuerpos y os cuerpos planos denzima d'o leito remanen flotando por a cambra. Paz
d'o silenzio azul que rechita y florexe dimpués de l'orgasmo aprendito, conoxito, feito, refeito y repasau.

Una man s'arrozega por o cobertor y amorta la luz. Remata o diya y prenzipia o tiempo, l'ambista, l'orache, a ora d'os mixíns, as estrelas y os suenios.

Bienplegada ella.

Bienplegau el.

Buena nuei y goyosos suenios,
á toz.


Entre bandiadors

11:57 p.m.

a suya mai perén le para
entrepáns d'imposibles con de fadas picáns
ta lebar t'a escuela
por si á meyo maitín
l'i dentra madurez
y le´n da por fer os quefers
u por arreguir-se d'os ninos espadachíns
que s'encorren en luita á muerte por a luna
u por mirar-se á ixa zagaleta de riso fazil
fer-se el tamién a rialleta y escribir doze begadas o suyo nombre
en una fuella d'o cuadernet de mates
u por badallar tanimientres chita una güellada á la Caperucheta Roya
plena de debuxos tobos y zerina de doré
u por preguntar que ye zeprenar u sozialismo
u por ulorar-se que os Rais son os pais
a Tronca Nadal tio lorién
y o Choriguet Pérez o monedero d'a yaya

asinas el tien a suya cullaradeta d'asperanza
ta concarar-se con ixa madurez zelosa argüellosa
y infantil
y dizir-le un diya más no,
sabes? güei soi canso, antimás me fa mal
o tozuelo...
...talmén maitín.

0:03 a.m.

torno amoniquet enta casa, china-chana, tastando a nuei, bolando sin d'endrezera por as zeras, con as mans en as pochas, mastegando lo silenzio chigán d'o cambión d'a basuera, os tasis con daria de nuei y a chen adormindo, a luna ye chelada, granaz, luen, me se mincha o corazón y os bodiellos y m'arrebulla, me fa sentir-me chicot y desamparau, luna lunera, cascabillera, con a suya cara seriosa de zercunstanzia y yo, posau en un banco d'o parque bruil mirándo-me-la fito-fito con o tricot pardo, a donzina, a carpeta y sin sueño, plen de tu 
y buedo de tot, 
alento fundo, te nimbio un pochón de goyosos suenios y torno amoniquet enta casa, china-chana, tastando a nuei, bolando sin d'endrezera por as zeras, con as mans en as pochas, mast

0:31 a.m.

yera
tan altizo y primet
siempre ubierto á os ninos, l'aire, a ternura,
con a pocha cutio plena
d'acarrazadas
firmes
de toz os tons,
grandarias,
colors,
tautos ...

y á la fin d'o cabo,
como toz...
ye iu bibindo de memoria
y agora s'amorta d'oíu.


Y dica astí puedo leyer, agora cal que me digan bustez si trigan iste libro, a pilota de golf d'a Bombi, u a forqueta.

Prenzipal Adibir web Escribe-nos Rechistra-te Qui somos
Diseño feito ta Internet Explorer y 800x600
© 2002-2010 Charrando.com

Rechistra-te:


Rechirar en Charrando.com



 


 
 Pachina empezipie
 Adibir en faboritos
 Recomienda-nos
 Escríbe-nos
 Qui somos