logo

Prenzipal Adibir web Escribe-nos Rechistra-te Nobedaz
A tuya finestra
 Escritos en chistabín y belsetán
 Por Óscar Lerín
El bubón

Ixe dia yera domingo, pero en si mesmo no barruntaba cosa espezial, no i yera pues un d'ixes dias que recosiras, tot el contrario parixeba que cuan estase a miercoles el domingo abría pasau como si no ese esistiu. La tarde se’n yiba y la nuet beniba dezaga con fil negro ta cusir el ziel.

Yo baixabe de San Chuan de Plan, d’ensayar es bailes tipicos con el corro de danzas tradizionals d’ixe lugá. Cuan arribabe ta Labuerda y dinantes de i plegá, prenié un curba, ni an ebe saliu d’ista cuan me i trobo astí, en metá de la carretera un bulto, que no me dio tiempo d’aberiguar qué yera, pos tenié que dare un chiro y esquibar-lo.

Dimpués de fer-lo como podié me’n bayé cara ta un planiello y deixé la botura astí, ixo si, primer dié la tornada y enfoqué con es faros el bulto ixe. Decamín biyé qué yera, se trataba d’un bubón (Bubo Bubo) que yera denzima de bela cosa que no se beyeba tansamén perque se i trobaba una miqueta lexos.

La situazión i yera peliaguta, ya que astí l’abe no podeba fer más que ganar-se bel tamborinazo. No solo que per trobar-se en metá de la calzada si que tamién per alcontrar-se chusto acabada la curba, el que feba prou difizil esquibar-lo, sobre tot como ises una mica despistau u rapido. Yera peligroso tanto ta l’animal como ta tu, el mesmo peligro correban es dos.

Con tot y con ixo miré que podebe fer, sabebe que no’n i eba guaire de tiempo, perque en cualquier inte podeba acayeixé una desgrazia, como a la fin pasó. Capiscar la imachen: un Nissan pilla la curba, frenazo y zas!. La polida abe, esturdida per el tastarrazo, cayo ta’l suel, entremistanto, l’auto se i disponeba a continar la marcha, como si no ese pasau cosa.

En ixe segundo, noté com la rabia y la impotenzia se ixemenaban per el mío cuerpo, secutindo-me-ne en el corazón. Corrié ta astí y el biyé, un bubón que eba matau un tipo d’esparbez, me pienso que yera un “aguilucho lagunero”, no sé como se dice en Aragonés, pero en l’aragonés de La Comuna bien podría está (en caso que no ese nombre) “Aligot de las basas”.

Una miqueta dimpués benió un coche y paró. Un ombre se’n baixó de la botura y me preguntó que eba pasau astí. Asinas que le’n conté, truquén a la guardia zibil, qui se’n presentón decamín, ya que i eba per allí una parella de zibils, y ni an tenioron que puyá es de L’Ainsa.

Es achens nos preguntón que eba pasau y si eben teniu aczidén, les contestén que i yeren bien y que no eba ocurriu cosa. Es zibils parón prou cuenta ta cullir l’abe, per ixo emplegoron una manta, y feban bien ya que no te’n puez fiá ni d’el pico esmolau ni de las suyas poderosas unyas.

Dimpués d’ixo nos ne bayén ta L’Ainsa (a l’ombre primer no’l torné a biyé más). Una bez astí se lebón l’abe ta la casa cuartel. Bels dias más tarde me enteré que la eban lebada ta’l zentro de recuperazión de l’Alfranca, tamién que eba muerto.

El bubón (Bubo Bubo) ye l’abe nueturna más gran d’Europa. Plega dica el metro güitanta de lonchitut d’ala ta ala (en es exemplars más grans), se alimenta de mamiferos (esquirols, cunils, llebres, fuinas, paniquesas...), tamién atras abes rapazes (diferens tipos d’esparbers como l’azor, milanos... y tamién nueturnas como el craberet, la babieca) y tamién mincha atros tipos d’abes como las grallas, cuerbos tordas.

Ye en el nuestro Pirineu ,chunto con l’aliga reyal y l’onso, un superdepredador. Ixo fa que en el mundo de las abes se i trobe drento de las familias de mayor alcurnia. Per ixo si a l’aliga reyal le gosan dezir la reina de las abes a el bubón se el conix como “el gran duque”.

Ya fa más d’un anyo dende l’ocurriu, pero no podré olbidar garra ixa mirada soberana y noble, ni tampó es suyo güellos de fuego. Fuego reyal muerto per l’esfalto bulgar, plebeyo.

Dedicau ta totas aqulas bitimas d’el gudrón que dengún plora.

Era
Era, eba deixato que se afogasen las suyas palabras, perque como muita chen creyeba que ixo de charrar l'aragonés yera parlar mal, e per ixo era se espresaba en castellano. Dende chiqueta a era l'eban inculcato el desprezio a la suya luenga, que ironicamén sentiba de la boca de sus pais, bezinos, amigos y familiars.

Eba aprendito prou luego que si quereba cabidar-se bela sonrisa de mofla i eba que charrar en castellano como el mosén, el medico u la mayestra. Per tot ixo, era siempre gosaba espresar-se en ixe idioma, sobre tot con es suyos fillos, talmén con la esperanza de que asinas ers podesen aspirar a més que quedar-se en lo lucar cudiando bela güella, e podesen deixar ixa bida tan esclaba que eba en es pueblos d'alabez.

Si con es fillos s'esforzaba per charrar fino, qué no faría con es suyos nietos. Con estes encara feba més per charrar en castellano. Con era yo siempre mirabe de parlar en aragonés de la Balle de Bielsa, e sobre tot querebe que era lo fese con yo, pero pocas bezes lo conseguibe. Era no entendeba güaire la mía afizión d'aprender ixe "parlaje" pos capiscaba que de seguro se me'n redirían como me sentisen charrar asinas.

Belas bezes, era me feba creyer que no sabeba mica ixa parla, e mesmo negaba que en Espierba se esen dito nunca palabras tan comuns como "borda", afirmando que astí siempre eban dito "cuadra". Con tot e con ixo de cuan en cuan era se debantaba e sacaba a relozir palabras d'ixa luenga u mesmo (prou pocas bezes) parlaba un Belsetán bien conserbato.

Era se deziba Rosa, e yera mi abuela, la enterrén lo dia 23 de chunio d'el 2002, a la güembra d'el Mallo Gran, montaña prou quiesta per era. Rosa ya forma parte de la tierra de la Balle Berde (Balle de Pineta), como es arbols, es ibons e las montañas. Tierra en la que yera nazita e an tanto eba chugato de chiqueta, tierra testigo d'es suyos primers besos d'amor, tierra que ha bisto creixer a es suyos fillos e dimpués a es suyos nietos.

Ta despedir-la muitas flors e bersos de la Birchen de Pineta (tan amata per yaya), con qui seguro que ye agora. Pero la luenga de la misa, como siempre, estió la ofizial (lo castellano). L'altra (l'aragonés) se'n yera ita con era, pos tamién ye parte de la tierra, al igual que es arbols, es ibons e las montañas, al igual que era.

El tuyo nieto, Óscar Lerín.

Prenzipal Adibir web Escribe-nos Rechistra-te Qui somos
Diseño feito ta Internet Explorer y 800x600
© 2002-2010 Charrando.com

Rechistra-te:


Rechirar en Charrando.com



 


 
 Pachina empezipie
 Adibir en faboritos
 Recomienda-nos
 Escríbe-nos
 Qui somos